Германскиот бундеслигаш Хофенхајм официјално го назначи Кристијан Илцер за нов тренер, објави клубот.
Илцер пристигнува од австрискиот Штурм Грац и потпиша долгорочен договор, иако клубот не ги објави деталите. Според германскиот весник „Билд“, договорот на Илцер е до 2027 година, а Хофенхајм платил отштета од 2,5 милиони евра.
„По турбулентните неколку дена, со нетрпение ги очекувам новите предизвици и можноста да ги запознаам играчите и тимот“, изјави Кристијан Илцер.
Илцер го замени Пелегрино Матарацо, кој беше отпуштен во понеделникот по ремито 0-0 против Аугсбург, одлука донесена поради слабата форма на тимот, кој се наоѓа на 15-то место на табелата во Бундеслигата.
Управниот директор за спортски прашања, Андреас Шикер, кој претходно соработуваше со Илцер во Штурм Грац, изрази голема доверба во новиот тренер.
„Го познавам и многу го ценам Кристијан од нашата заедничка работа и сум уверен дека тој е идеалниот тренер за визијата што ја имам за Хофенхајм“, истакна Шикер.
