Ноќеска во НБА-лигата се одиграа вкупно девет меча, а гостите беа поуспешни со пет победи, додека домашниот терен го одбранија четири екипи. Во отсуство на Лука Дончиќ, лидерската палка во тимот на Далас ја презеде Кајри, кој одигра одлично второ полувреме и со вкупно 32 постигнати поени, шест асистенции и седум скока ги предводеше Маверикс до триумф на гости кај Атланта од 129:119.
Актуелниот првак Бостон селтикс стигна до шестиот триумф во низа,откако на свој терен убедливо со 126:94 славеше над Лос Анџелес клиперс. По подолга пауза, првиот меч сезонава го одигра Порзингис, кој постигна 16 поени за Бостон. Освен Порзингис, уште четворица играчи на Бостон дадоа над 15 поени, и тоа Причард и Татум со по 20 поени, Вајт 19, а Браун со 17 поени. Кај поразениот тим, Зубац даде 23 поени.
Њујорк одигра одличен меч на гости кај Денвер и победи со високи 145:118. Ануноби со 40 поени и Таунс со 30 поени беа незадржливи и вистински лидери на Њујорк. Кај Денвер единствено Вестбрук со 27 поени и Јокиќ со 22 поени беа расположени за игра, но тоа беше премалку да се надеваат на победа.
Резултати: Шарлот – Орландо 84:95, Детроит – торонто 102:100, Индијана – Њу Орлеанс 114:110, Атланта – Далас 119:129, Бостон – ЛА клиперс 126:94, Мемфис – Портланд 123:98, Денвер – Њујорк 118:145, Голден стејт – Бруклин 120:128 и Сакраменто – Оклахома 109:130.
