Во дербито на вечерта во НБА-лигата, Кливленд славеше над Бостон со 115:111. За Кливленд, кој е најдобар тим на Истокот ова беше 18-та победа во 21 меч, додека Бостон е втор во оваа конференција со биланс од 16 победи и четири порази.
Кливленд водеше во најголем дел од првото полувреме, но Бостон одигра фантастична трета четвртина, која ја доби со 35:21, па во пресрет на решавачките 12 минути гостите имаа водство од 84:72. Сепак, Кливленд покажа зошто во моментов е најдобриот тим, па се вратија во игра и кога губеа со 93:81. Домаќините поведоа со 103:101 и во неизвесната завршница имаа повеќе смиреност, па на крајот се радуваа на триумф.
Донован Мичел со 35 поени беше прв стрелец кај Кливленд, додека Џејсон Тејтум постигна 33 поени за Бостон.
Словенецот Лука Дончиќ одигра феноменален меч во победата на Далас против Портланд со резултат 137:131. Дончиќ постигна 36 поени, а имаше и 13 асистенции и седум скока. Во победничкиот тим одличен беше и Гримс со 28 поени, додека кај Портланд прв стрелец беше Симонс со 27 поени, пет асистенции и три скока.
Никола Јокиќ беше на своето ниво и заврши со трипл-дабл од 28 поени, 14 скока и 11 асистенции, но тоа на крајот не беше доволно, па неговиот Денвер загуби со 126:122 од Лос Анџелес клиперс.
Клиперс уште во првата четвртина стигна до двоцифрена предност од 29:19, но на полувреме резултатот беше нерешен (59:59). Денвер водеше во текот на речиси целата трета четвртина (најмногу 83:73), но кога беше најважно, во последните 12 минути, кошаркарите на Клиперс заиграа и во неизвесна завршница на крајот стигнаа до победата. Џејмс Харден со 39 поени, 11 асистенции и девет скока беше најефикасен кај тимот од Ел Еј, додека Пауел додаде 28 поени.
Во останатите мечеви кои се играа ноќеска: Њујорк – Њу Орлеанс 118:85, Торонто – Мајами 119:116, Хјустон – Оклахома 119:116, ЛА лејкерс – Портланд 105:131, Сакраменто – Сан Антонио 125:127, Бруклин – Орландо 92:100, Мемфис – Индијана 136:121.
