Рајо Валјекано направи изненадување и одигра нерешено 3:3 против Реал Мадрид во меч од 17 коло во шпанското првенство. Домаќините уште во четвртата минута најавија дека се подготвени да го изненадат големиот фаворит и со голот на Лопес поведоа со 1:0. Веќе во 36 минута беше 2:0 за Рајо кога погоди Мумин.
Реал се врати во игра во финишот на првото полувреме. Најпрво Валверде со шут од далечина погоди за 1:2 во 39 минута, а до крајот на првиот дел следуваше и нова радост за гостите.
Џуд Белингам продолжи да погодува за Реал Мадрид, а овојпат погоди во 45 минута кога со удар со глава го матираше домашниот голман.
На почетокот од второто полувреме Реал направи и целосен пресврт кога убав гол даде Родриго за водство на гостите од 3:2.
Рајо не се предаде и со голот на Паласон израмни на 3:3, што на крајот се покажа како конечен резултат. Со еден освоен бод Реал сега има 37 бодови и остана на второто место на табелата, зад вечниот ривал Барселона која останува лидер со 38 бодови.
