Кристијано Роналдо пред десетина дена привлече големо внимание со тврдењето дека фудбалското првенство во Саудиска Арабија е посилно од тоа во Франција. Роналдо веќе две години е дел од тимот на Ал-Наср во Саудиска Арабија, а по неговиот трансфер следуваше „лавина“ од квалитетни играчи кои пристигнаа да играат во оваа земја.
Една од најголемите ѕвезди, секако, е и Нејмар, кој е дел од тимот на Ал-Хилал. Бразилецот играше многу малку за Ал-Хилал затоа што една година беше надвор од теренот поради повреда, но проценил дека Роналдо е во право околу тоа колку е квалитетно првенството на Саудиска Арабија.
„Се согласувам со Кристијано Роналдо. Мислам дека денеска саудиската Про лига е подобра од Лига 1 во Франција. Квалитетот на фудбалот во Саудиска Арабија расте, играчите се сè подобри. Секако дека и француското првенство е добро, играв таму и многу добро го знам и квалитетот што го имаат“, рече Нејмар во интервју за Си-ен-ен.
Иако го фали првенството на Саудиска Арабија, многу веројатно е дека Нејмар набрзо ќе си замине од таму. Сè погласни се шпекулациите дека Бразилецот може да направи трансфер во американската МЛС. Самиот Нејмар изјави дека желба би му било повторно да се направи триото со Меси и Суарес, соиграчи со кои имаа блескави моменти во дресот на Барселона. Меси и Суарес се дел од тимот на Интер Мајами.
Нејмар веќе има купено земјиште во Мајами, што е само уште еден предзнак дека наскоро може да се случи негов трансфер во тимот на Интер во САД.
