Сержо Консеисао имаше одлично деби на клупата на Милан откако во првите два меча ги победи Јувентус и Интер во Суперкупот и го освои трофејот. Сепак, кога се работи за дебито во Серија А како предводник на Росонерите, португалскиот стратег немаше добар прв меч.
Милан на „Сан Сиро“ одигра само 1:1 против Калјари, екипа која е во зоната за испаѓање. По првото полувреме немаше голови, а на почетокот на второто полувреме Алваро Мората донесе голема радост за домашните навивачи.
Сепак, радоста на Милан траеше кратко. Само четири минути подоцна Калјари израмни со голот на Зортеа.
Во текот на целиот меч Милан доминираше на теренот, домаќините упатија дури 22 шута кон голот на гостите од кои 10 беа во рамките на голот, но останаа само на тој еден погодок на Мората кој на крајот се покажа како доволен само за еден бод.
По ова реми Милан има 28 бодови и е на осмото место на табелата со дури 16 бодови помалку од лидерот Наполи. Калјари со 18 бодови е на 18 место на табелата и останува во зоната за испаѓање.
