Во кошаркарската НБА-лига беа одиграни четири натпревари на кои беа постигнати следните резултати: Атланта – Хјустон 96-100, Филаделфија – ЛА лејкерс 118-104, Голден стејт – Јута 114-103 и Портланд – Милвоки 125-112.
Тајрис Макси со 43 поени беше поентер на вечерта во НБА и предводник на 76-ките во триумфот над Езерџиите. По мечот, Макси, кој петта сезона е во НБА, за првпат реши да побара дрес од легендата Леброн Џејмс, за кого рече дека му е како постар брат.
Филаделфија беше ослабена, но дојде до третата победа по ред. Кели Убре даде 20 поени и има серија од три меча едноподруго барем со 20 поени. Кај Лејкерс, Ентони Дејвис играше само десет минути, а потоа се повреди (истегнат мускул во абдоменот).
Портланд предводен од Израелецот Дени Авдија извојува победа над Милвоки, за кого играше легендата на Блејзерс, Демијан Лилард. Портланд има 3-1 против Милвоки откако си замина Лилард. Авдија даде 30 поени, што е негов сезонски рекорд. Јанис Адетокумбо постигна 39 поени, Лилард уфрли 20, но заморените Елени немаа сила за победа на својот трет меч во последните четири дена.
На гости победија Ракетите од Хјустон, кои сега имаат четири победи по ред и се зацврстија на втората позиција на Западот, а Атланта има црна низа од шест порази во низа.
