Тренерот на Аталанта, Џанпјеро Гасперини, е најсериозен кандидат за нов тренер на Рома. Според информациите на „Ил Месаџеро“, раководството на римскиот клуб покажува интерес Гасперини да го преземе тимот од лето.
Во моментов, Рома ја предводи Клаудио Раниери, кој се врати во клубот во ноември и успеа да ја стабилизира екипата. Сепак, неговиот договор трае само до крајот на сезоната, а според некои италијански медиуми, Раниери лично имал разговор со Гасперини за можноста тој да го наследи на клупата на римскиот клуб.
Гасперини е познат по својот успешен ангажман во Аталанта, каде што го издигна тимот до значајни достигнувања и во италијанското првенство и во европските натпреварувања. Неговиот стил на работа и способноста да развива млади таленти го прават атрактивен избор за Рома, која бара долгорочен проект за развој на клубот.
Сепак, засега нема официјална потврда од ниту една страна за можниот ангажман на Гасперини во Рома. Но, тренерот на Аталанта меѓу редови најави дека е можна разделба со тимот од Бергамо на крајот од сезоната.
