Барселона ќе има дрим-тим и посебно опасен напад ако се остварат трите трансфери кои се најавуваат. Офанзивниот дел кај Каталонците ќе изгледа фантастично, ако на „Камп Ноу“ пристигне Антоан Гриeзман, а покрај него за голови ќе бидат задолжени Лионел Меси и Луис Суарес.
Трио фантастико во нападот, со засилен среден ред во кој новитет ќе биде Френки де Јонг од Ајакс. Тој веќе е играч на Барселона, па би играл во средината на теренот заедно со Бускетс и Артур во формацијата 4-3-2-1.
Ако пристигне и еден од најталентираните стопери Матајс де Лихт, исто така моментно играч на Ајакс, тогаш и одбраната би била без замерки.
Со него и со Пике централниот дел од дефанзивата изгледа одлично, а на бочните позиции во најсилниот стартен состав би играле Алба и Семедо. На голот и во следната сезона веројатно ќе биде Марк-Андре тер Штеген, кој имаше добра сезона.
Според последните најави од Каталонија, на кормилото останува Ернесто Валверде.
