Поранешниот светски рекет број 1, Американецот Андре Агаси, мисли дека шпанскиот тенисер Карлос Алкарас е играч кој ги комбинира најдобрите квалитети на Новак Ѓоковиќ, Рафаел Надал и Роџер Федерер, но предупреди дека тоа не е гаранција за постигнување на истите успеси како оние на „големата тројка“.
„Алкарас се брани како Новак, ја има моќта и спинот на Надал, а исто така ги има рацете и финесите на Федерер. Но, само тоа што го комбинира најдоброто од тројцата не значи дека ќе ги постигне нивните успеси. Има многу варијабли во тенисот, како носење одлуки, повреди, среќа“, рече Агаси.
Американецот го искажа и своето мислење за Ѓоковиќ, нагласувајќи дека отсуството на неговите големи ривали може да влијае на неговата мотивација.
„Ги загуби луѓето со кои пишуваше историја. Ова секако ќе биде емотивен предизвик за него. Кога Пит Сампрас се пензионира, тоа ме врати назад и ме натера да барам нова инспирација. Обложувањето против Ѓоковиќ е на ваш ризик. Тој направи толку многу, можеби ја загуби енергијата, но не и неговите способности. Ќе му станува сè потешко да продолжи да доминира, но никогаш не би го отпишал“, вели Агаси.
