Македонската фудбалска репрезентација е во Малта и се подготвува за утрешниот меч против Малта од квалификациите за Европското првенство кое следната година ќе биде во Германија.
Одлична е атмосферата во македонскиот табор, посебно по ремито пред два дена против Италија. Македонија има четири бода од четири меча и е на четвртото место во групата, зад неприкосновениот лидер Англија (13 бода од пет меча), Украина 7 бода од 4 меча и Италија 4 бода од три меча. Зад нас е единствено Малта, која нема ниту еден бод од четири средби.
Македонија утре ќе ја има фаворитската улога, која ако ја оправдаме, ќе ни донесе нови три бода со кои остануваме во трка за вторто место кое води на завршницата на ЕП.
Аријан Адеми нема да биде во комбинација и за овој меч бидејќи се жали на повреда на мускулот на ногата, останатите треба да се подготвени за настап. По ремито со Италија, кај сите во македонската селекција владее оптимизам, но и каење за пропуштената шанса пред три месеца на дуелот против Украина, кога водевме со 2:0, а на крајот загубивме со 2:3.
Сосема поинакви ќе беа калкулациите ако тогаш освоевме три бода против Украина. Ние да победевме тогаш, сега табелата ќе беше сосема поинаква. Македонија ќе беше втора со седум бода, а Украина ќе беше со четири и нашите шанси за ЕП ќе беа многу поголеми.
Сепак, надежта уште постои. Ако можевме повторно да ја изненадиме Италија, зошто да не се размислува на три бода од Малта, а потоа и машки одиграни дуели против Италија и Украина на гости и ново изненадување дома против Англија.
Македонија против Италија уште еднаш покажа дека знае да игра добар фудбал, но тоа треба да продолжи и утре против Малта, како и на преостанатите средби до крајот на квалификациите.
