Македонскиот интернационалец Аријан Адеми си заминува од Динамо Загреб, официјално потврдија од клубот.
„Овој петок ГНК Динамо и Аријан Адеми потпишаа договор за раскинување на договорот, и со тоа капитенот на Сините после 15 години од пристигнувањето во Динамо ја заврши својата играчка епизода на Максимир. Адеми е најтрофејниот играч во клупската историја со освоени 24 трофеи, од кои 13 шампионски титули, седум Куп пехари и четири суперкупови. За Динамо одигра 430 официјални натпревари, со што го држи второто место на историската листа на клубот на играчи со најмногу настапи. Аријан има и 110 настапи во европските натпревари, што го прави апсолутен рекордер на Сините. Драг Аки, ти благодариме за се и со среќа во новиот фудбалски предизвик. Вратата на твоето Динамо секогаш е отворена за тебе“, објавија од Динамо.
Потоа имаше уште една кратка објава со наслов: Фраер е Аки.
Но, фанови на Динамо коментираат дека ова не е соодветно простување со човекот кој „ги остави коските“ во клубот и заслужи да му се организира проштален меч.
Како што стојат работите, Адеми кариерата ќе ја продолжи во унгарскиот клуб Ујпешт.
