Ако има добро време за прв пораз, Спортинг го одбра вистинскиот момент
Единствениот тим од десетте најсилни шампионати во Европа што сè уште е непоразен во меч од домашно првенство вчеравечер доживеа елиминација во купот.
Ако воопшто има добро време за прв пораз во сезоната, тогаш тајмингот на Спортинг за сефте неуспех е погоден и елиминацијата од Маритимо во националниот куп нема да биде премногу болна за Лавовите од Лисабон.
Пињо и Андраде со по еден погодок во второто полувреме му донесоа вредна победа на Маритимо и го елиминираа фаворитот од Лисабон во осминафиналето од португалскиот куп.
Со првиот пораз сезонава на Спортинг нема веќе непоразени во шесте најсилни фудбалски земји во Европа, а тимот од Лисабон останува единствениот тим во таа конкуренција што е без пораз во првенствен меч.
Во Спортинг се надеваат на подвиг и на освојување на домашната круна по пауза од цели 18 години, па поразот и елиминацијата во купот од Маритимо не им падна премногу тешко.
По одиграни 13 кола во португалскиот шампионат, избраниците на Рубен Аморим се први со 35 бода, освоени со 11 победи и две ремија, а зад нив се гигантите Порто и Бенфика со по 31 бод и Брага со 27 како четири најголеми конкуренти за титулата.
