Нов клупски првак на Јужна Америка ќе биде Фламенго. Ова го најавивме уште на 2 август, благодарение на неверојатна традиција која почна во 2012 година, а тоа е титулата во Копа Либертадорес да ја освојува клуб од земја од која претходната година славел во Копа Судамерикана.
Фламенго во финалето ќе игра против Ривер плејт и тоа ќе биде вистинска дерби пресметка која ќе се игра во Чиле, освен ако нее биде сменето местото на одигрување поради политичките немири во оваа земја.
Во 2012 година, бразилскиот Сао Пауло ја освои Копа Судамерикана и наредната година Копа Либертадорес ја освои бразилски клуб, Атлетико Минеиро, но тогаш веројатно никој не претпоставуваше дека е почеток на една невидена серија. Во 2013 година аргентинскиот Ланус победи во Судамерикана, а во 2014 Либертадорес му припадна на Сан Лоренсо. Потоа Ривер плејт две години по ред (2014 Судамерикана и 2015 Либертадорес) ги освојуваше клупските натпреварувања.
Следуваа радости за Колумбијците. Санта Фе во 2015 освои Судамерикана, а Атлетико Насионал во 2016 освои Копа Либертадорес. Низата ја продолжија Бразилците со Шапекоенсе и Гремио, па Аргентинците со Индепендиенте во 2017 на Судамерикана и Ривер плејт во 2018 во Либертадорес.
Минатата година, Копа Судамерикана ја освои Атлетико Паранаенсе од Бразил. Годинава за освојување на трофејот во Копа Либертадорес редот повторно им е на бразилските тимови. Финалист е Фламенго, па ако треба да се верува на традицијата, клубот од Рио де Жанеиро ќе му биде потенцијален ривал на Ливерпул во финалето на Светското клупско првенство.
