Манчестер сити вчера загуби со 1:0 во дерби-пресметката со Арсенал, а повторно бледо издание имаше напаѓот на Граѓаните, Ерлинг Халанд, со што ги загрижи и навивачите и луѓето во клубот.
Халанд веќе трет натпревар по ред не постигнува гол за Сити (Арсенал, Ред Бул Лајпциг, Вулверхамтон), а на вчерашното дерби против Арсенал беше буквално „ставен во џеб“ од Габриел и Вилијам Салиба.
Статистиката покажува дека против Арсенал, Халанд не доби ниту еден дуел со Салиба, а Манчестер сити само четирипати шутна на голот на Топчиите, што е најслаб учинок од април 2010 година.
„Ова не е начин на кој сакавме да одиме на пауза. Но, ќе закрепнеме заедно, како и секогаш“, објави Халанд по поразот.
