Фудбалерите на Јувентус на последните три првенствени натпревари освоија само бод, па во Милано веќе можат да започнат да го ладат шампањското бидејќи Интер сега има дури седум бода предност пред екипата од Торино, односно осум од градскиот ривал Милан.
Освен лошите игри, навивачите на Јувентус му се налутија на тренерот Масимилијано Алегри и поради изјавата која ја даде по мечот со Удинезе (0-1), во којшта имаше само пофални зборови за Интер.
„Амбицијата да останеме блиску до Интер ни даде мотивација, но како што сум кажал и претходно, Интер игра одлична сезона и заслужува пофалби. Го започнаа својот проект со Антонио Конте пред многу години и нормално е да бидат фаворити. Јувентус пред две години тргна по друг пат, нашата цел е прво да се вратиме во Лигата на шампионите“, рече Алегри.
