Фудбалерите на Наполи и Јувентус утре од 20:45 часот со меѓусебната дерби-пресметка ќе го отворат 18-тото коло во Серија А.
Наполи е лидер на табелата и има седум бода повеќе од Јувентус, кој е второпласиран и се наоѓа во серија од осум победи по ред, а згора на тоа нема ниту еден примен гол во тие осум меча.
„Се чувствуваме добро, подготвени сме. Ќе видиме утре колку можеме бидејќи играме против најдобриот тим во Серија А. Имаме уште многу да работиме за да ја оствариме нашата цел, а тоа е пласман во Лигата на шампионите следната сезона“, рече тренерот на Јувентус, Масимилијано Алегри.
Алегри имаше само пофални зборови за неговиот колега Лучијано Спалети, кој седи на клупата на Наполи.
„Го почитувам Лучијано, кој е одличен тренер. Наполи е главен фаворит за титулата, тоа е технички многу добра екипа“, додаде Алегри.
Првиот натпревар помеѓу Јувентус и Наполи сезонава заврши без победник, 1:1.
