Челзи минатиот викенд загуби од офанзивно настроениот Манчестер сити, а синоќа Сините беа совладани и од дефанзивно поставениот Јувентус. Масимилијано Алегри покажа дека и со спротивна тактика од таа на Хосеп Гвардиола може да се дојде до триумф над лондонскиот тим.
„Кога морнарите се во бурно море, тие секогаш можат да го најдат излезот. Тоа го направивме со одличен натпревар против шампионот на Европа. Шест освоени бода без примен гол е добар чекор кон осминафиналето. Секоја почит за Челзи, но Шченсни немаше потреба да направи ниту една вистинска интервенција“, изјави Алегри.
Јуве му дозволи на Челзи да има посед на топката од 66 проценти, но ги затвори приодите кон голот и чекаше шанса од контри. Старата дама беше без првите стрелци Дибала и Мората, но Бернардески и Кјеза го шокираа европскиот првак со гол само по 9 секунди игра во второто полувреме, што е најбрз гол од тргнување од центар до погодок во историјата на ЛШ.
