Бразилецот Андерсон беше еден од милениците на легендарниот тренер на Манчестер јунајтед, Сер Алекс Фергусон. За сума од 30 милиони евра, Андерсон дојде на „Олд Трафорд“ од екипата на Порто и цели седум годни беше дел од најтрофејниот англиски клуб.
Иако многумина велеа дека тоа е играч кој нема квалитет да игра во клуб како што е Манчестер, Фергусон веруваше во Андерсон, а тоа носеше и резултати. Со Бразилецот во составот, Манчестер освои четири титули во Премиер лигата, а имаше трофеи и во Лига купот, Комјунити шилд, Лигата на шампиони и Светско клупско првенство.
Андерсон одигра 181 меча за Манчестер, но кога Фергусон реши да замине во пензија, тоа значеше и крај на неговата кариера на „Олд Трафорд“. Oд Манчестер замина во Фиорентина, но не се докажа, потоа играше во Интернасионал во Бразил, па во Коритиба, а на минатата сезона одигра 11 меча во Адана во втората турска лига. На 31 година, Андерсон реши да ја заврши кариерата.
