Алкалоид имаше фантастична европска авантура минатата сезона и тимот го освои трофејот во ЕХФ Купот. Сега, во новата сезона следува нов голем предизвик за тимот од Автокоманда, а тоа е обидот да се пласира во групната фаза во ЕХФ Европската лига.
Алкалоид воопшто немаше среќа во ждрепката, па за противник го доби тимот на ТСВ Хановер Бургдорф. Се работи за противник кој го има највисокиот рејтинг меѓу екипите што играат во квалификациската фаза и една од најсилните во германската Бундеслига.
Токму затоа Алкалоид е во улога на аутсајдер, што го потврдуваат и квотите за денешниот меч во Германија.
Сепак, Алкалоид во Германија не е со „бело знаме“ и тимот на Кирил Лазаров најави дека ќе се бори да стигне до што е можно подобар резултат, пред реваншот кој ќе биде следната недела во Скопје.
