Шпанскиот тенисер Карлос Алкарас изјави дека сака да игра против Новак Ѓоковиќ кога Србинот е во најдобра форма.
Алкарас со победата над Томи Пол во два сета (6:4,6:4) обезбеди пласман во полуфиналето на Мастерсот во Мајами, а по мечот беше запрашан за коментар на изјавата на Новак Ѓоковиќ од пред еден месец, во која рече дека кога е во најдобра форма, тогаш знае дека е најдобар тенисер на светот.
Алкарас и Ѓоковиќ досега одиграле само еден меч меѓу себе, и тоа минатата година во полуфиналето на Мастерсот во Мадрид. Победата ја однесе Алкарас, и тоа во три сета (6:7,7:5,7:6).
„Играв против Ѓоковиќ кога беше на 100 отсто, би рекол дека минатата година во Мадрид играше многу добро. Беше тесно и се согласувам со него. Кога е на 100 отсто, тогаш веројатно е еден од најдобрите или е најдобар тенисер на светот“, изјави Алкарас.
Младиот шпански тенисер исто така истакна дека беше импресиониран од играта на Новак Ѓоковиќ на првиот годинешен гренслем, Отвореното првенство на Австралија.
„Тоа што Новак го постигна е фантастично. Неговото ниво на игра во Австралија беше неверојатно. Како што реков, сакам да играм против Ѓоковиќ кога е на 100 отсто и сигурен сум дека ќе уживам“, додаде Алкарас.
