Карлос Алкараз го направи едно од најлегендарните враќања во финале на Гренд слем турнир, откако успеа да го освои Ролан Гарос, иако губеше со 2:0 во сетови против јаник Синер. Италијанскиот тенисер не само што имаше водство од 2:0 во сетови, туку во четвртиот сет имаше и три врзани меч-топки, но Алкараз не се предаде и успеа да ги спаси, а потоа, во меч кој траеше повеќе од пет и пол часа, Шпанецот да се радува на трофејот.
„Највозбудливиот натпревар во мојата кариера, без сомнение. Овој натпревар имаше свои добри и лоши моменти. Горд сум на тоа како се справив со сè денес. Ова е моја прва победа од 0:2, не можеше да биде подобра можност за нешто такво – финале на Гренд слем“, рече Алкараз на прес-конференција.
Многумина веќе го споредуваат со тениски легенди како што се Ѓоковиќ, Надал, Федерер, Борг, Мекенро…
„Искрено, ако луѓето го стават овој натпревар во таа кошничка, тоа е голема чест. Не знам дали е на тоа ниво, тие натпревари се во историјата на тенисот и историјата на спортот. Ќе оставам други луѓе да зборуваат за тоа, а јас сум среќен што го пишувам моето име во историјата на Ролан Гарос.“
Го прашаа како се вратил на натпреварот, како си дал енергија.
„Морав да се борам цело време, морав да верувам во себе цело време. Кога го направи брејкот на почетокот од третиот сет, почувствував дека сè оди во негова корист, дека удира сè, дека има многу винер удари, дека ќе ја погоди линијата со секој удар. Брзо потоа се обидов да ги оттргнам тие мисли и да се борам. Публиката ми беше многу важна денес, особено некои сегменти од публиката кои беа навистина поддржувачки. Без нив, ќе беше невозможно да се вратам“, вели Алкараз кој има само 22 години, а веќе пет трофеи од гренд слем турнирите.
Ова беше прв пат Алкараз и Синер да играат во финале на гренд слем турнир и сигурно тенисот добива уште едно големо ривалство.
„Секој натпревар што го играм против него… Ова е нашето прво финале на Гренд слем, се надевам не и последно. Секој пат кога играме еден против друг, го креваме нивото на врвот. Мислам дека тоа е важно и за навивачите. Ако сакам да освојувам Гренд слем титули, морам да ги победам најдобрите. Ова нема да биде пресвртница, тој ќе научи нешто од овој натпревар, сигурен сум дека ќе си ја заврши домашната работа и ќе се врати посилен. Ќе се обидам да научам нешто и од ова, за да видам што можев да направам подобро тактички. Нема да го победувам засекогаш, па затоа морам да учам“, заврши Шпанецот.
