Со само седум освоени бодови од првите шест кола, Манчестер јунајтед покажува дека и оваа сезона ќе иде очаен. Црвените ѓаволи претходната сезона ја завршија дури на 15 место на табелата, а сега се 14-ти, што е само доказ дека нема некое подобрување во играта и резултатите.
Поради лошите резултати, постојано има притисок врз тренерот Рубен Аморим, а португалскиот стратег вели дека воопшто не размислива да си замине, затоа што тој не се чувствува како виновен за лошите резултати.
„Сакам да продолжам да работам тука. Да се борам. Но, проблемот сега е што губиме натпревари – од тоа страдам, а не од мојата работа. Не станува збор за стравот од губење на работата. Не ми е гајле. Ви велам дека кога ќе заврши натпреварот и можете да ме видите, мојата работа не ме интересира. Оваа болка од непобедување на натпревари или неуспех. Тоа е она што најмногу ме боли“, вели Аморим.
Денеска на „Олд Трафорд“, Манчестер ќе го пречека Сандерленд, тим кој има само еден пораз во шесте дуели сезонава и е со одлична одбрана затоа што прими само четири гола и ја има третата најдобра дефанзивна линија во лигата.
