Тренерот на Манчестер јунајтед Рубен Аморим потврди дека нема да размислува на титулата во Премиер лигата ниту во следната сезона. Португалскиот стратег е категоричен дека неговиот тим ниту во следната сезона нема да има никакви шанси да се бори за трофејот кој го немаат освоено уште од заминувањето на легендарниот Сер Алекс Фергусон од клупата на „Олд Трафорд“.
„Не сум луд да кажам дека следната сезона ќе бидеме шампиони на Англија. Мора многу напорно да работиме за да бидеме подобри од оваа сезона. Дали е реално да се надеваме на освојување на титулата пред 2028 година? Знам дека во следните година-две нема да бидеме сериозен конкурент за трофејот. Мора многу да работиме. Некои од играчите уште не може да се адаптираат на новите стандарди. Сменивме многу луѓе кои работеа во клубот и во стручниот штаб, но треба да се менуваат и некои други работи“, вели Аморим.
Манчестер сезонава е очаен и е на 13 место на табелата со освоени 37 бодови од 30 натпревари. Сепак, тимот уште има шанси да се избори и за место во Лигата на шампиони за следната сезона, доколку Црвените ѓаволи го освојат трофејот во Лига на Европа.
