Tренерот на Реал Мадрид, Карло Анчелоти, беше бесен по поразот на неговиот тим со 1-2 од Бетис во натпреварот од 26. коло на шпанската Ла Лига. Тој истакна дека тимот не одиграл на потребното ниво и дека треба веднаш да се разбуди во пресрет на дуелот со Атлетико Мадрид во Лигата на шампионите.
„Започнавме добро, но потоа не успеавме да го задржиме нивото, ангажманот и ставот. Тие заслужија да победат. Ова е тежок удар, мора да реагираме. Не одигравме добро на овој натпревар“, изјави Анчелоти.
Со овој пораз Кралевите сериозно ги компромитираа шансите за одбрана на титулата.
„Не сум во главите на играчите. Не успеавме да го одржиме темпото. Ако играме вака, нема да победиме против Атлетико Мадрид во Лигата на шампионите, тоа е јасно. Се надевам дека ќе се разбудиме“, додаде Италијанецот.
Сега Реал Мадрид ќе се надеваат на кикс на вечниот ривал Барселона, кој вечерва го игра својот натпревар од колото против Реал Сосиедад. Синоќа Атлетико Мадрид со триумфот над Атлетик Билбао (1-0) се искачи на првото место на табелата во Ла Лига.
„Килијан Мбапе имаше проблем со изваден заб и не беше 100% подготвен, не тренираше многу, па затоа решив да го заменам. Добро се снајдовме во првите 20 минути, но во останатите 70 игравме лошо“, заклучи Анчелоти.
