Тренерот на Реал Мадрид, Карло Анчелоти, зборуваше по убедливата победа на Кралевите против Брест со 0-3 во натпреварот од последното, осмо коло на основната фаза во Лигата на шампионите.
Реал Мадрид не успеа да се пласира меѓу најдобрите осум, а сега ризикува да игра против Манчестер сити во плејофот од елитното европско клупско натпреварување.
„Премногу натпревари. Премногу одиграни средби. Треба да ги намалиме, а не да додаваме нови. Игравме покомпактно, поефикасно и добро во одбраната. Ова е добар момент за тимот и мора да продолжиме во истиот дух“, изјави Анчелоти.
Тренерот на актуелниот европски шампион зборуваше и за индивидуалните настапи на своите фудбалери.
„Родриго е одличен, како и останатите. Тој постигнува многу голови, но ние имаме голем потенцијал во нападот. Тимот игра добар фудбал“, додаде Анчелоти.
Еден од можните противници на Реал Мадрид во елиминациската фаза е Манчестер сити, против кого играа во последните три изданија на турнирот – еднаш Граѓаните беа победници, додека двапати шпанскиот гигант продолжи понатаму.
„Ждребот е пред нас, а што ќе се случи – ќе се случи. За да ја освоиш Лигата на шампионите, мора да победиш во секој натпревар“, заклучи Анчелоти.
