Реал Мадрид и четвртипат оваа сезона загуби од Барселона, овојпат во Ла Лига, па сега имаат само теоретски шанси за одбрана на трофејот, со оглед на тоа дека „каталонците“ имаат +7 на три кола до крајот на првенството.
Анчелоти е задоволен од она што го одиграа неговите избраници, а причината за поразот ја бара во отсуството на пет дефанзивци.
„На двапати имавме можност да израмниме на 4-4. Натпреварот беше неизвесен до самиот крај. На теренот бевме рамноправни. Добро напаѓавме, можевме и уште подобро, но направивме грешки кои на крајот нѐ чинеа примени голови. Лоши бевме во одбраната, но да не заборавиме дека ни недостасуваа пет дефанзивци. За да победите на ваков натпревар, мора добро да напаѓате и добро да се браните, а ние само добро напаѓавме.“ – рече тренерот на Реал Мадрид, Карло Анчелоти, после поразот од 4-3 во Ел Класико.
Сепак, иако Италијанецот вели дека мечот бил рамноправен, статистиката вели нешто друго. Барселона имаше посед од 62%, наспроти 38% на Реал Мадрид. Ударите кон противничкиот гол беа 23-9 во корист на „каталонците“, а 10-2 во корнери за Барселона.
