Ангажманот на Карло Анчелоти во Реал Мадрид завршува на 25 мај, а веќе следниот ден и официјално ја презема репрезентацијата на Бразил. Причина за разделбата се лошите резултати, а Реал Мадрид веќе ги загуби финалните натпревари од Купот и Супер купот на Шпанија од најголемиот ривал, Барселона, беше елиминиран од Лигата на шампионите од Арсенал, а речиси и ја загубија титулата во Ла Лига. Барселона има предност од седум поени пред Кралевите, но Анчелоти вели дека првенството уште не е завршено.
„На 26 мај ќе бидам селектор на Бразил, но првенството сè уште не е завршено и ние не се предаваме. Сè уште сум тренер на Реал и сакам да завршам на најдобар можен начин, бидејќи го почитувам овој клуб, неговите навивачи и фудбалерите. На сè во животот му доаѓа крајот. Уживав овде. На клубовите им требаат промени, исто како и на тренерите. Таков е животот и нема потреба од драма. Да ми кажеше некој дека ќе освојам 11 трофеи во четири години, ќе речев дека е невозможно. Прекрасно ми беше во Мадрид. Никогаш немав проблеми со Реал. Мадрид го носам во срце. Се забавувавме и освоивме многу трофеи. Додека сум жив, ќе бидам навивач на Реал Мадрид“, рече Анчелоти на прес-конференцијата пред мечот со Мајорка.
