Феноменалниот гол што Лука Модриќ го постигна против Жирона во неделата повторно го отвори прашањето за неговата иднина. Сè погласни се шпекулациите дека капитенот на Реал Мадрид, кој во септември ќе наполни 40 години, би можело да го продолжи договорот со мадридскиот клуб за уште една сезона.
На оваа тема се огласи и тренерот на Реал, Карло Анчелоти, кој на прес-конференцијата имаше позитивен став.
„Не сакам да се мешам, тоа е прашање што тој ќе го реши со клубот. Така беше и со Начо и со Крос, па и со самиот Модриќ. Легендите имаат право сами да одлучат за својата иднина. Тоа е ставот на клубот и заедно ќе ја донесат најдобрата одлука за сите“, изјави Анчелоти.
Модриќ пристигна во Реал Мадрид во 2012 година и досега има освоено неверојатни 28 трофеи, што го прави рекордер на клубот. Највпечатливи се неговите шест титули во Лигата на шампионите, како и четири шампионски титули во Ла Лига. Анчелоти неодамна изјави дека со оглед на сè што постигнал, Модриќ треба да игра за Реал „се додека тој самиот го посакува тоа.“
