Нема време за одмор, македонската репрезентација после големата победа над Косово, сега се врти кон обврските во новата сезона во Лигата на нации, утре Рисовите гостуваат кај Естонија, сонадеж дека ќе ја продолжат серијата позитивни резултати.
Селекторот Игор Ангеловски на официјалната прес-конференција спроти утрешниот натпревар против Естонија во Талин ги сподели своите очекувања за натпреварот од третиот круг од групата Ц во Лига на нации.
„Се подготвуваме како и за секој друг натпревар. Мечот против Косово веќе е зад нас и целосно сме фокусираме на утрешниот натпревар. Стартувавме добро во групата од Лига на нации и нашата цел е освојување на трите бода на утрешниот дуел. Квалитетот на моите фудбалери ми дава право да верувам дека ќе успееме, навистина сум среќен што работам со оваа група на фудбалери кои на секој следен натпревар ја потврдува својата вредност. Сите се ставаат во функција на тимот и на тој начин ги покриваме и проблемите кои ги имаме со повредени фудбалери. Го почитуваме противникот, имаат добри фудбалери, Туњов од Спал, Васиљев од Флора и треба да бидеме максимално внимателни“ – изјави селекторот Ангеловски.
И Тричковски е со слично размислување.
„Фокусот ни е насочен кон нашиот тим, иако го сметаме за многу сериозен составот на Естонија. Важно е да бидеме на високо ниво, иако доаѓаме по исклучително важниот натпревар против Косово во кој го постигнавме тоа што го сакавме. Утре е нов меч и се подготвуваме да го добиеме. Се надевам дека сите ќе го сфатиме максимално сериозно и ќе одиграме на наше, високо ниво“ – изјави Тричковски.
