Бекот на англиската репрезентација, Кајл Вокер, в сабота ќе ја има најтешката задача на Мундијалот во Катар, да се обиде да го запре Килијан Мбапе во четвртфиналната пресметка против Франција.
„Веќе играв против него неколку пати, па се надевам дека ќе ми биде од помош тоа искуство. Мбапе е фантастичен играч кој се наоѓа во одлична форма, па дуелите против него, ќе ми претставуваат голем предизвик. Како професионалец може да играте против најдобрите играчи, а Килијан е еден од најдобрите на светот“, вели Вокер.
Дефанзивецот на Манчестер сити веќе има играно неколку пати против Мбапе ѝ и има порака за одличниот напаѓач кој досега на СП во Катар постигна пет гола.
„Полесно е да се каже отколку да се направи тоа, да се задржи Мбапе, но, не се потценувам. Играв против едни од најдобрите играчи на светот, но сега е поинаку бидејќи станува збор за Светско првенство и играње за својата репрезентација. Мора да го почитувате Килијан, но, не му давајте преголем респект. Ќе биде тежок натпревар, но тој нема да биде Англија против Мбапе, туку Англија против Франција. Ова е Светско првенство, и девизата е победи или умри. Не сакам предвреме да си одам дома, нема да му дозволам да го уништи мојот сон“, додава Вокер.
