Неколку екипи од Премиер лигата, загрижени за „несоодветна музика“ што ја слушаат нивните фудбалери, решија да им воведат рестрикции, односно да им забранат пристап до некои од „контроверзните“ песни, пишува весникот „Мирор“.
Новите мерки ќе се однесуваат само на времето што фудбалерите ќе го поминуваат на стадионите и во клупските простории.
Весникот пишува дека клубовите наводно ќе користат софтвер за блокирање песни за да ги спречат нивните фудбалери да слушаат музика што содржи навредливи текстови, вулгарности, експлицитна содржина или навредливи пораки против жените.
Фудбалерите редовно користат свои музички плејлисти на услуги како што е „Спотифај“ и на терените за тренинзи, во соблекувалната или во вежбалниците. Со новите одлуки, фудбалерите повеќе нема да имаат целосна слобода во изборот на музика, бидејќи луѓето од управите ќе ги филтрираат или блокираат песните што ги сметаат за несоодветни.
