Астон Вила ќе биде во центарот на голема трансферна битка ова лето доколку се реши да го стави на продажба Морган Роџерс.
Според пишувањата на британските медиуми, за 23-годишниот англиски репрезентативец интерес покажуваат Арсенал, Манчестер јунајтед и Челзи, а до неодамна како кандидат се споменуваше и Ливерпул.
Роџерс, кој од почетокот на минатата сезона има 24 голови и 23 асистенции, минатото лето потпиша нов договор со кој е врзан за клубот до 2031 година. Сепак, долгорочниот договор не значи дека тој сигурно ќе остане, туку напротив, може да ја зголеми неговата пазарна вредност.
Астон Вила би можела да бара најмалку 80 милиони фунти за неговиот трансфер, а дополнително 20% од идната продажба би оделе на неговиот поранешен клуб Мидлзборо.
Клубот од Бирмингем и понатаму се соочува со предизвици околу правилата за профит и одржливост, што може да ги натера на голема продажба за подобрување на финансиската состојба.
Клучен фактор за неговата иднина ќе биде и пласманот во Лига на шампиони, што Роџерс силно го посакува. Учеството во елитното натпреварување би донело и значајни приходи за клубот.
Дополнително, неговиот настап за националниот тим на големи натпреварувања би можел уште повеќе да ја зголеми неговата цена и интересот на европските гиганти.
