Фудбалерот на Ал-Етифак од Саудиска Арабија, Џордан Хендерсон, ја доби честа да ја носи капитенската лента на репрезентацијата на Англија на пријателскиот дуел против Австралија на „Вембли“. Тоа наиде на свирежи од трибините од страна на домашните навивачи, кои му се лутат на поранешниот фудбалер на Ливерпул за трансферот кој го направи во Саудиска Арабаија, каде што заработува по 40 милиони евра годишно.
„Секој има право на свое мислење. Сакам да играм за Англија, тоа го правам со години и затоа сè уште сум во репрезентацијата. Сакам да дадам сè за мојот тим и мојата земја. Многу ни значи мене и на моето семејство што го водев тимот на овој натпревар. Специјална вечер во која успеавме да победиме“, изјави Хендерсон по натпреварот.
Сепак, фудбалерот беше запрашан и за причината поради која навивачите го исвиркаа.
„Не, не сум изненаден бидејќи разбирам зошто размислуваат така. Јас на тоа гледам од поинаков агол, очигледно. Но, јас ги разбирам и морам да го прифатам тоа. Повторувам, тоа нема да ме промени. Играм фудбал во друга земја, каде што сакам да ги подобрам работите на теренот, но и надвор од него. Тоа е сè што се обидувам. Мислам на фудбалот. Јас не сум политичар, разбираш? Нема да се занимавам со политика. Отсекогаш сум се концентрирал само на фудбалот, се трудам да им помогнам на луѓето кои бараат помош. Кога играм фудбал, се трудам да го подобрам фудбалот и саудиската лига и мојот тим“, додава Хендерсон.
