Килијан Мбапе во Реал Мадрид вредно работи на закрепнувањето од повредата на коленото, па нема дилема околу неговото учество во реваншот од осминафиналето на Лигата на шампионите против Манчестер сити, потврди тренерот на Кралевите, Алваро Арбелоа.
По убедливата победа над Сити, Реал веќе утре ќе го одигра следниот меч, кога на „Сантијаго Бернабеу“ ќе го пречека Елче. Арбелоа истакна позитивни вести за Мбапе.
„Ситуацијата не е сериозна. Секој ден напредува и се движи според планот што го направивме кога одлучивме да го стопираме и кога ги изведовме тестовите. Многу добро се снаоѓа. Нема да биде достапен утре, но уверени сме дека ќе биде подготвен да отпатува за Манчестер“, изјави Арбелоа на денешната прес-конференција.
Тренерот потоа се осврна и на дуелот против Елче.
„Пристапуваме кон оваа средба со менталитет да се бориме за титулата. Ова е клучен меч дома и сакаме атмосфера слична на онаа од средата. Нашите противници играат многу добро, подобро отколку што покажува нивното бодовно салдо. Ни го отежнаа првиот меч и подготвени сме да вложиме дополнителен напор, свесни колку е тежок противникот. Нашиот единствен фокус е победа над Елче“, изјави младиот стратег.
И покрај убедливата победа над Манчестер сити, Арбелоа нагласи дека секоја следна средба е најважна.
„Имам само играчи кои се трудат, посветени и свесни за важноста на мечот. Утре ќе изведеме најдобар тим за да го победиме Елче и не размислувам за ништо друго. Играчите мора да одат дома исцрпени по секоја средба, да закрепнат и да размислуваат за следниот дуел. На секои три дена треба да даваат сè од себе и да бидат подготвени да трчаат и да се борат како што тоа го направија минатата среда“, порача Арбелоа.
Познат по тоа што им дава шанса на младите играчи, тој не ја исклучи можноста утре уште некој од академијата, освен Тијаго Питарх, да добие минути на теренот.
„Момците мора да продолжат да работат со скромност. Многу внимание е насочено кон нив, но мора да продолжат да се трудат и да го заслужат времето на теренот. Не смеат да ја изгубат менталната и работната етика што ги доведоа овде. Можеби утре ќе видите уште неколку од нив“, додаде Арбелоа.
