Одлуката на Фудбалската федерација на Македонија приходот од влезниците за натпреварот против Велс да биде дониран за повредените и семејствата на загинатите од пожарот во Кочани, треба да биде мотивација плус за љубителите на спортот да купат билет и да ја поддржат македонската репрезентација на средбата во вторник вечер на Арената „Тодор Проески“ во Скопје.
На фудбалерите ќе им треба силна поддршка од трибините на дуелот со опасниот Велс, а како што стојат работите, веројатно Арената ќе биде исполнета, и така треба да биде поради фудбалерите, хуманоста кон Кочани, љубовта кон Македонија.
Билети може да се купат на онлајн платформата eticket.ffm.mk, која е тројазична, на македонски, албански и англиски јазик.
Има информации дека досега се продадени околу 18.000 билети, што е повеќе од половина од капацитетот на стадионот.
