Арсенал има една цел во викендот кој следи, а тоа е да победи на свој терен против Евертон во меч од 31. коло на Премиер лигата. Топчиите се лидери на табелата, а Евертон е на осмото место. Тренерот на Арсенал, Микел Артета знае дека го чека тежок предизвик, а посебно пофални зборови имаше за менаџерот на Карамелите, Дејвид Мојс.
„Тој ми ја промени кариерата откако решив да се вратам во Шпанија. Дејвид ме донесе во Евертон и ми покажа нови хоризонти во играта додека бев играч. Имаме многу убави спомени заедно. Тој е еден од најголемите менаџери во Премиер лигата. Да се одржи тоа ниво и конзистентност во толку многу различни клубови е исклучително тешко“, рече Артета за Мојс.
Тренерот на Арсенал неодамна беше критикуван поради играта на Топчиите, а Артета имаше одговор и за тоа. „Се обидуваш да играш најдобро што можеш и да го добиеш натпреварот. Тоа е сè. Сфатив што се случува во Премиер лигата кога го гледав дуелот од Лигата на шампионите помеѓу Њукасл и Барселона. Барселона е еден од највозбудливите тимови за гледање во Европа. Тие се соочија со Њукасл, кој е многу интензивен и многу добар во транзицијата. И видовме сосема поинаков натпревар, натпревар што никогаш не сум го видел Барселона да го игра. За тоа, огромна заслуга има Њукасл. Тоа е лигата во која играме. Не ја гледате Барса да игра така во Шпанија. Тоа беше поинаков вид натпревар“, потенцираше Артета.
