Микел Артета, менаџерот на Арсенал, призна дека зголемениот список на повреди може да го направи тимот ранлив во трката за трофеи оваа сезона.
Арсенал си обезбеди место во петтото коло на ФА купот со убедлива победа од 4-0 над Виган на „Емирати“, меѓутоа Рикардо Калафиори се повреди за време на загревањето и не можеше да започне како стартер, додека Бен Вајт беше принудно заменет во второто полувреме.
Капитенот Мартин Одегард не се појави на теренот поради повредата што ја доби во ремито 1-1 против Брентфорд минатиот четврток.
Кај Хаверц ќе биде надвор од теренот барем до крајот на месецот, а Микел Мерино се очекува да отсуствува до крајот на сезоната по операцијата на стапалото.
„Прво се повредија напаѓачите, потоа дефанзивците, а сега и фудбалери од средниот ред. Сепак, се справуваме некако со тоа. Но, потребни ни се некои играчи да се вратат и во форма не само по број, туку и со различни опции за противниците, па колку побрзо се вратат, толку подобро за тимот“, изјави Артета.
Арсенал со предност од четири поени на врвот на Премиер лигата ќе се соочи со Вулверхемптон в среда, пред клучното дерби на Северен Лондон против Тотенхем наредниот викенд.
