Менаџерот на Арсенал, Микел Артета, изрази разочараност поради ремито со Сандерленд во Премиер лигата, откако неговиот тим испушти победа во судиското продолжение и мечот заврши 2-2.
„Секако дека сме разочарани, бидејќи сакавме три бода и беше навистина тешка средба. Се соочивме со ситуации кои се сложени и требаше да се справиме со нив. Дозволивме гол кој не е на нашите стандарди, но потоа тимот реагираше одлично, покажа карактер и храброст. Противникот постигна два гола, но ние доминиравме во играта“, изјави Артета.
Тој нагласи и дека одбраната мора да биде поорганизирана.
„Треба да го штитиш својот шеснаесетник кога тие доаѓаат со шест или седум играчи. Тоа може да се случи од игра, од аут или од било каква ситуација. Можеме подобро да се браниме, но денес не го направивме тоа и примивме гол. Разочаран сум бидејќи можевме подобро да се браниме, но мора да го признаеме и трудот на противникот“, истакна менаџерот на Арсенал.
