Менаџерот на Арсенал, Микел Артета, изрази задоволство од начинот на кој неговите играчи успеаа да доминираат во клучните моменти при победата од 2-1 во лондонското дерби против Челзи во 28-ото коло на Премиер лигата. Победата ја врати предноста на Арсенал на пет поени пред Манчестер сити, кој има натпревар помалку.
„Знаевме дека ќе биде тежок меч. Челзи е тим со висок квалитет, многу добро подготвен од својот тренер. Мислам дека направивме неколку одлични работи во текот на натпреварот. Голот што го примивме во финишот на првото полувреме беше разочарувачки, но имавме цело второ полувреме пред нас. Требаше подобро да ја контролираме топката и да разбереме колку се важни индивидуалните дуели при статични ситуации, бидејќи Челзи е тим кој добро напаѓа и се брани при корнери и слободни удари“, изјави Артета.
Челзи имаше можност за израмнување во финишот, но Раја беше одличен на голот.
„Последната одбрана на Давид Раја беше неверојатна. Не требаше да се најдеме во таа ситуација. Среќни сме, знаеме дека имавме два тешки натпревари оваа недела. Задоволен сум од ставот на играчите и нивната подготвеност да дадат сè и да доминираат. Март е, играме во сите натпреварувања и сме меѓу лидерите“, заклучи Артета.
