Бразилскиот фудбалер Артур Мело може да биде казнет затоа што прекрши едно од правилата на однесување на тренинзи за време на пандемијата. Артур во тренинг-центарот на неговиот клуб Барселона во петокот дошол со „ренџ ровер“, а денеска со „ферари“.
Дали станува за незнаење на Артур или намерно прекршување на протоколот кој им беше испратен на играчите, не се знае, но факт е дека на тренинг дојде со две различни возила.
Од Ла Лига велеа дека исполнувањето на сите точки е предуслов за продолжување на сезоната. Пред некој ден, Херта го казни и го суспендира својот играч Саломон Калу до крајот на сезонава за избегнување на санитарните протоколи.
Каталонскиот гигант реагираше веднаш и објави дека колата со која Артур дошол во петокот имала механички проблем, и дека инспекторот на лигата бил запознат со тоа, па Бразилецот нема да биде казнет.
