Македонската фудбалска репрезентација ги започна подготовките за натпреварите против Италија (17 ноември) во Рим и Англија (20 ноември) во Скопје од квалификациите за Европско првенство 2024.
Во пресрет на двата последни меча од квалификациите, своите очекувања ги дадоа Јани Атанасов и Дарко Чурлинов.
„Радува тоа што сите сме здрави и подготвени, посебно што во тимот се враќа Тихо Костадино,в кој имаше долга пауза поради повреда. Мечот со Италија очекувам да биде сосема поинаков од тој во Скопје. Се надеваме на успех. Треба да бидеме компактни, желни за успех и да ги исполниме задачите на селекторот“, вели Атанасов.
Чурлинов вели дека е во подобра форма отколку пред еден месец и ветува дека ако добие шанса, ќе даде максимум.
„Иако немаме шанса за пласман на Европско првенство, ќе дадеме максимум, така е секогаш кога играме за Македонија. Знаеме какви светски сили се Италија и Англија. Ќе ги анализираме противниците, немаме што да загубиме и едноставно треба да одиграме максимално ангажирано. Во добра натпреварувачка форма сме и се надевам дека тоа ќе го искористиме. Ќе се обидеме да го спречиме италијанскиот состав да победи. Играме за Македонија, кога е така, не постојат изговори“, изјави Чурлинов.
