За прв пат сезонава, Атлетико Мадрид врза две победи по ред во Ла Лига. За денешната победа од 2:1 над Џирона, „јорганчиите“ мораа да се борат до 90 минута.
Долго време, домаќините ги контролираа случувањата на „Ванда Метрополитано“ бидејќи со головите на Анхел Кореа во 5. и во 48. минута имаа два гола предност.
Но, со голот во 65. минута на Родриго Рикелме кој игра во Џирона како позајмен играч токму од Атлетико, се врати неизвесноста и гостите до последниот свиреж на судијата претставуваа постојана опасност кон голот на Јан Облак.
Џирона дури ја погоди и стативата, но на крајот Атлетико успеа да ја сочува предноста и да дојде до триумф кој го искачи на четвртото место на табелата.
