Холандскиот репрезентативец Мемфис Депај во зимскиот преоден рок од Барселона ќе се пресели во Атлетико Мадрид, и тоа за ситни пари.
Оваа вест ја потврдија двајца новинари, Тони Хуанмарти и Фабрицио Романо, кои на социјалните мрежи напишаа дека Атлетико ќе плати само три милиони евра отштета.
Холанѓанецот е во последната година од договорот, на лето би си заминал без обештетување, поради што Барселона ја прифатила понудата на Атлетико.
Процесот го забрзал самиот фудбалер, кој деновиве одби да се пресели во Интер во замена за Марсело Брозовиќ, а згора на тоа го прескокна и денешниот тренинг, по кој требало да има разговор со тренерот Чави Ернандез.
По овој потег, Чави и управата дефинитивно го отпишаа Депај и експресно ја прифатија понудата на Атлетико, кој од претходно ги имаше договорено сите услови со Холанѓанецот.
Депај треба да потпише договор со Атлетико Мадрид до јуни 2025 година.
Ова не е првпат, Атлетико да ја изработи Барселона и да ѝ земе за бадијала нејзини играчи. Јорганџиите за 120 милиони евра ѝ го продадоа Гриезман на Барселона, а по неколку години подоцна потоа го вратија назад само за 30-тина милиони. Луис Суарес, кој беше прекуброен во Барселона, потпиша договор за Атлетико и во првата сезона ја освои титулата во Ла Лига.
