Австриските ракометари се полни со респект кон македонската репрезентација, но сепак домаќините веруваат дека може да стигнат до победа со која сигурно ќе бидат први во групата и ќе пренесат два бода за во главната фаза. Бековите Никола Билик и Јанко Божовиќ се двајцата најопасни играчи во составот на Австрија.
Божовиќ многу добро го познава македонскиот ракомет, но и дел од нашите репрезентативци затоа што во минатото беше играч на Металург. Тој потенцира дека Лазаров е најопасниот играч на Македонија, но и дека Австрија има сили да стигне до победа.
„Ништо не е завршено, иако имаме две победи и сме први во групата. Нè чека натпревар со Македонија, а последните меѓусебни натпревари немаа позитивен исход за нас. Ќе биде многу тешко. Се работи за репрезентација која го има еден од најдобрите десни бекови на светот Кирил Лазаров. Но, не е само Лазаров, имаат и други квалитетни играчи, играат агресивно во одбрана… Реков ќе биде многу, многу тешко. Нашата сила е тимскиот дух, играме сите за еден, гинеме, а имаме и одлична поддршка од навивачите. Секако дека сакаме денеска да победиме и да пренесеме два бода во групната фаза. Победата на Чешка над Македонија ни дава надеж, но ќе кажам уште еднаш, ќе биде многу тешко, нè чека голема борба“, вели Јанко Божовиќ.
