Баерн Минхен не се откажува од намерата да го доведе крилниот фудбалер на Ливерпул, Луис Дијас, и подготвува нова понуда. Црвените веќе одбија две понуди од баварскиот гигант, последната во висина од 67,5 милиони евра.
Според германскиот „Билд“, 28-годишниот Колумбиец веќе остварил видео-разговор со тренерот на Баерн, Венсан Компани, и изразил јасна желба да се пресели на „Алијанц арената“. Тој веќе го информирал Ливерпул за својата одлука, а клубот уште пред неколку месеци знаел за неговата намера да замине.
Преговорите меѓу двата клуба ќе продолжат, а внатре во Баерн постои силна поддршка за трансферот. Влијателни фигури на „Забенер Штрасе“ веруваат дека Дијас може веднаш да го засили тимот и да помогне во освојувањето на трофеи.
Во меѓувреме, Баерн преговара и со Штутгарт за напаѓачот Ник Волтемаде и се подготвува нова понуда за него.
Доколку една од овие две зделки пропадне, алтернатива е Чави Симонс, репрезентативецот на Холандија и фудбалер на Лајпциг.
