Натпреварите ПАОК и Бешикташ и Тирана – Црвена ѕвезда, кои се играат вечерва во рамките на квалификациите за Лигата на шампионите во фудбал, носат посебна тежина со тоа што им се дава и политички предзнак. За организаторите и полицијата олеснителна околност е што нема да има публика на трибините, па барем од таа гледна точка би требало да нема проблеми.
Српскиот првак не е добредојден во главниот град на Тирана, па забрането ќе биде какво било собирање околу стадионот на два часа пред почетокот на мечот и по завршувањето на средбата, а Црвено-белите се под огромно обезбедување во и околу хотелот. За Тирана играат нашите Тошевски и Најдовски, а изјавите на фудбалерите од двете страни се дека не ги интересира национализмот туку само победа.
УЕФА најчесто е ригорозна кон политички и расистички пораки, па ќе треба да се спречат и најавите за истакнување пораки преку дрон, како пред некоја година во Белград, кога играа Србија и Албанија.
И во Солун ќе биде напнато. Таму играат Црно-белите од Солун против Црно-белите од Истанбул.
Пред извесно време беше објавено дека фудбалерите на ПАОК ќе носат гаќи на кои пишува „Аја Софија“, „Мала Азија“, „Бегалци“, „Константинопол“ и слично. Грците сакаат на Турците да им покажат дека имаат право на некои делови од нивната територија, а и да изразат негодување за претворањето на музејот и некогашна најголема православна црква „Аја Софија“, во џамија.
