Енис Барди ќе биде резерва за Леванте вечерва против Барселона од 21 часот на „Сиудад де Валенсија“ и ќе чека шанса да влезе во игра во дел од мечот, а можеби и да постигне нов гол против Каталонците по четири години пауза.
Сè уште се памети натпреварот игран на 13 мај 2018 година што заврши со победа на Леванте од 5:4 и на кој блескаше Барди со два гола, заедно со тројниот стрелец Емануел Боатенг, кој веќе не игра за Леванте.
Тогаш и Кутињо даде хет-трик за Барселона, а едeн погодок постигна и Луис Суарес во еден од најубавите мечеви во историјата на Ла Лига.
Вечерва Барди е резерва на натпревар што е исклучително важен за двете екипи. Леванте е претпоследен со 22 бода и не смее да загуби ако сака да остане во битката за опстанок, а гостите од Барселона ќе сакаат да победат за да бидат во конкуренција за второто место.
Моментно Реал Мадрид е лидер со 72 бода пред Севилја со 60, а Барселона е трета со 57 бода, но и два меча помалку од ривалите.
