Фудбалската репрезентација на Македонија утре (15 часот) на стадионот „Реинпарк“ во Вадуц го стартува новиот квалификациски циклус за СП 2026. Нашиот национален тим е фаворит на дуелот со Лихтенштајн, но капитенот Енис Барди вели дека тоа ќе мора да се потврди и на теренот.
„Нема фаворити во денешниот модерен европски фудбал. Сите заслужуваат респект, а сѐ друго треба да се заслужи на теренот. Ова е нов старт за нас, треба да ја канализираме енергијата, да покажеме максимум и да освоиме три бода. Веруваме дека можеме да направиме многу во овој нов циклус и да го оствариме нашиот сон за нешто големо“, изјави капитенот Енис Барди.
Тој потенцираше дека во овие тешки моменти сите треба да им дадеме поддршка на семејствата на настраданите во огромната трагедија, а фудбалерите тоа ќе го направат со максимална посветеност на теренот и носење гордо на македонскиот дрес.
