Барселона победнички си заминува од Белград по дуелот против Црвена ѕвезда, откако каталонскиот гигант славеше со 98:94 во пресметка на која мораше да се играат дополнителни пет минути за да се реши победникот. По регуларниот дел беше 84:84, а во продолжението, Барселона стигна до триумф во „луд“ меч кој траеше два и пол часа, а имаше преку 25 промени на водството, што доволно покажува колку беше неизвесно. На крајот, херој на мечот е Кевин Пантер кој погодуваше тројки кога беше најпотребно за гостите.
Барселона добро го започна дуелот и поведе со 11:5, но домаќините се вратија во игра и стигнаа до минус еден (25:26). Во втората четвртина Црвена ѕвезда водеше со шест поени (39:33), а на полувреме замина со предност од 47:44.
Во средината од третата четвртина Црвена ѕвезда стигна до највисоката предност од девет разлика (65:56), но Барселона не се предаде и со серија од 11:1 стигна до водство од 67:66. Тоа беше најава дека ќе има неизвесна завршница. Во последните 100 секунди се влезе со резултат 80:80. На 20 секунди до крајот Црвена ѕвезда водеше со 82:81, домаќините промашија едно слободни фрлање и Барселона имаше напад за победа. Кевин Пантер погоди тројка за 84:82 на 10 секунди до крајот, а потоа Јаго Досантош погоди за 84:84 на неполни пет секунди до крајот.
https://twitter.com/i/status/1847370458355978560
Во продолжението од пет минути неизвесноста продолжи, а во последната минута се влезе со резултат 93:93. Тогаш повторно одговорноста ја презеде Пантер кој погоди тројка за 96:93, а потоа ги даде и полседните поени на мечот за триумф од 98:94. Црвена ѕвезда останува повеќе од седум години да чека да се израдува на победа против Барселона.
На останатите три меча кои се играа вечерва, се радуваа домаќините. Монако беше убедлив и со 101:85 славеше над Виртус Болоња, турскиот Ефес во драматичен меч беше подобар од Олимпијакос со 91:89, а Асвел со 76:69 ја победи Басконија.
